ކަލޯމެން ކެމްޕެއިން ކޮށްދީގެން ހޮވުނު ރކ ކޮމެޓީ ފެއިލްވީތަ؟

ގޮތެއްފޮތެއް ހުރި މީހެއްވިއްޔާ ދެފަހަރު ދެއަނގައިން ވާހަކަ ދައްކަންވީމާ ލަދުގަންނާނެއެވެ. ޖެހިލުންވެސް ވާނެއެވެ. އެކަމަކު މިބައިގަނޑުގެ ތެރޭގައި ލަދުހަޔާތެއްހުރި ހަމައެކަކުވެސް ނެތޭބުނެވެނީ މިކަހަލަ ވާހަކަ ދައްކާތީއެވެ. ފަތަފޮޅީގައި އެކަހަލަ ވާހަކަތައް ޖަހަންކެރޭތީވެސް ދެރަވަމެވެ.

ރކ ކޮމެޓީ އޭއްޗެކޭ މެމްބަރުންނޭ ކިޔާ މިހާރު ވީދޭނިކަމެް ނެތެވެ. މިހާރު އެއްޗެހި ކިޔުމުގެ ބޭނުމެއް ނެތެވެ. ރައްޔިތުންނަށް މިއަދު ދޮލޯ ދުއްމާރިއަށް ނުގޮވާ ވާނުވާ ނޭނގޭބައެކޭ ކިޔާނެކަމެއް ނެތެވެ. ރައްޔިތުން ދުނިޔެއަށް ހޭލައްވަނީއޭ ހައްޤުތައް ހޯދައިދެނީއޭ ހޭލުންތެރި ކުރުވަނީއޭ ކިޔައިގެން ރައްޔިތުން ރކ ކޮމެޓީގެ ވޯޓުގައި އަނދަވަޅަކަށް ވައްޓާލާ ގަންބުވާލީ ތިޔަބައިގަނޑެވެ.

ކަލޭމެން އެދުވަހު ކަންތައްކުރީ ކަލޯމެންގެ މައިސޯބު ކުޑަދަށު ޒަޢީމުގެ ވިސްނުމާ އެއްގޮތަށެވެ. ޒައީމު ބޭނުންވި ގޮތަށެވެ. ޒައީމު ނިލަންދޫ ކޮންމެ މީހަކަށ ހިލޭ މާލެ ދެކޮޅު ދަތުރެއްކޮށްދޭނެއޭ ކޔާގެން ރައްޔިތުންގެ ބޮލަށް ސަވާރުވެ ގުއިރީ ކެމްޕޭނު ކޮށްދިނީ އަތޮޅުވެރިޔާގެ މުޢާވިން ޖަލީލު ދޯއެވެ. ދެންތިބި ޒައީމުގެ ބޯއީންތައް ރކ ކޮމެޓީގެ މެމްބަރުކަމަށް ހޮވެންދެކަށް ދުވާލަކު އެއް ފަހަރު ސައިދީނަމޭ ބުނެގެން އެމީހުންނަށް ވޯޓް ހޯދައިދޭން ރައްޔިތުންގެ ފަހަތުން ތެޅިބޭލީ މޫސާ އަޙުމަދު ދޯއެވެ. ކޮންމެ ގެއަކުން ކުނި ބަރޮލެއް އުކާލަދޭނަމޭ ބުނެގެން ރައްޔިތުން ކައިރީ އާދޭސް ދެންނެވީ ނަސިމްބެ ދޯއެވެ. ވޯޓެއް ދީފިނަމަ ފިހާރައިން ޑިސްކައުންޓް ދޭނަމޭ ކިޔާ ބެނާތަކާއި ފޮތިތައް ދެމީ ކަރިމްބެ ދޯއެވެ. ނޫނީ ވިއްޔާ ކަލޯމެންގެ ޒައީމުއާއި ޒައީމުގެ ބޯއީސްތައް ހޮވުމަށް އެދި ކެމްޕެއިން ކޮށްދިނީ ޢަލީ މުޙައްމަދާއި ޝަރީފާއި މީސްމީހުންދޯއެވެ.

އެންޓި އެފް އޯއަށް ތިބައިގަނޑުގެ ގޮތްގަނޑު މާކުރިންވެސް އޮތީ އެނގި ދަސްވެ ނިމިފައެވެ. ރައްޔިތުންނަށް ކޮންމެ ގޮތެއްވިޔަސް ހެޔޮތާއެވެ. ކޮންމެ ޙާލެއްގައި އުޅެންޖެހުނަސް އެއީ ތިލުއްޗާތަކަށް މާބޮޑު ކަމަކަށް ނުވާނެއެވެ. ރައްޔިތުންނަށް ނުވިޔަސް ކަލޯމެންނަށް ސިރިޔާ ދެކޮޅު ދަތުރު ހިލޭ ކުރެވޭ ނޫންހެއްޔެވެ. ކުނިވެސް އުކާލެވޭ ނޫންހެއްޔެވެ. ހޮޓާހޮޓަލުން ސައިވެސް ލިބޭ ނޫންހެއްޔެވެ. ތީއަބަދުވެސް ތިގތަށް މީހުންދައްކާ ލާރީގެ ދަޅައަށް ހެއްލިގެން އުޅޭ ބައިގަނޑެކެވެ. ކޮންމެ ގޮތަކުންވިޔަސް ބައިރުފިޔާއެއް ނަމަވެސް ލިބެނިކޮށް ނިމުނީއެވެ.

ކޮންމެއަކަސް ކަލޯމެންގެ ވަސްވާހުގައި ރައްޔިތުންގެ ބަޔަކު އެދުވަހު ޖެހުމުގެ ނަތީޖާއަކީ މިއަދު ގިސްލާ ރޮވުމެވެ. އެކޮމެޓީގެ އެއްވެސް އޮއްޓަރެއް ނެތްކަން މިއަދު އެދަނީ ފެންނަމުންނެވެ. އެއީ ރައްޔިތުންނަށް ހެޔޮއެދޭ ރަށުގެ ތަރައްޤީއަށް މަސައްކަތް ކުރުމުގެ ބަދަލުގައި އަމިއްލަ އެދުމަށް މަސައްކަތްކުރާ ބައެއކަން އެދަނީ ފެންނަމުންނެވެ. ބަހާއި ޢަމަލާއި ދިމާނުވާ ރައްޔިތުންނަށް ފައިދާ ހޯދައިދިނުމުގެ ބަދަލުގައި ގެއްލުން ދެނިވިގޮތަށް މަސައްކަތްކުރާ ކޮމެޓީއެއްކަން އެވަނީ ސާބިތުވެފައެވެ.

މިކަންކަމާމެދު ދެންފަހަރަކުންވެސް ވިސްނުމަށް ރައްޔިތުންގެ ކިބައިން އެންޓި އެފް އޯ އިޚުލާޞްތެރިކަމާއެކު އެދެމެވެ. ބަޔަކު މީހުން ދައްކާ ދަޅަތަކާއި އަވާގައި ނުޖެހި މޫނަށް ކަނދުރާއަކަށް ބެލުމެއްނެތި ރަށަށް އެންމެ ފައިދާވަނިވި ގޮތަށް ކަންކަން ނިއްމައި، އެންމެހާ ރައްޔިތުންގެ ލާބައާއި މަންފާއަށް ވިސްނައި ކުރިމަގުގައި ވޯޓް ދެއްވާށެވެ. ނިލަންދޫ ރައްޔިތުންނަކީ ހެޔޮބަސް އަހާ ހެޔޮބަސް ޤަބޫލުކުރާ ބައެއްކަމާމެދު އެންޓި އެފް އޯގެ ހިތުގައި އެއްވެސް ޝައްކެއް ވަހުމެއް ނުވެއެވެ.